Erlend dæmi‎ > ‎

Bowland AONB - Bretlandi

Til fróðleiks verður hér tekið stutt dæmi af The Forest of Bowland, svæði í Bretlandi sem reyndar er ekki þjóðgarður, heldur fellur undir flokk svæða sem Bretar nefna Area of Outstanding Natural Beauty. Hann er hér felldur í flokk með „regional parks" eða svæðisgörðum sem eru þekktir í mörgum löndum Evrópu og víðar. 

Svæðisgarðar
Svæðisgarðar eru ólíkir þjóðgörðum að því leyti að frumkvæðið að stofnun þeirra er nánast alltaf hjá heimamönnum sjálfum. Grasrótin á tilteknu svæði ákveður að eiga með sér samstarf um tiltekna hagsmuni, í atvinnu- og byggðarlegu tilliti, á grundvelli sérkenna svæðisins. 

„Sense of Place"
Sem hluta af stefnu um sjálfbæra ferðaþjónustu Í Bowland-svæðisgarðinum var unnið á athyglisverðan hátt með sérstöðu og „staðaranda" (sense of place) svæðisins. Markmiðin voru að:
  • sameinast um að kynna þau sérstöku gæði sem svæðið hefur
  • setja fram samræmd skilaboð sem aðilar geta notað við að kynna sína starfsemi
  • auka meðvitund um það sem svæðið hefur upp á að bjóða
  • auka skilning á náttúru og menningu svæðisins og stuðla að tryggð íbúa og gesta við það
Verkefnið fólst í að aðstoða þá sem voru með starfsemi á svæðinu eða höfðu áhuga á að hefja þar starfsemi, við að nýta sér sérkenni svæðisins við þróun og markaðssetningu á vörum og þjónustu. 

Leitað var til íbúa, ýmissra félagasamtaka, ferðamanna og annarra aðila til að fá upplýsingar um sérkenni svæðisins og áhugaverða staði. Upplýsingarnar voru nýttar til að skilgreina „staðaranda" svæðisins. Síðan voru þær settar fram í bæklingi (verkfærakistu) sem lýsir sérkennum svæðisins, tækifærum sem í þeim felast og hvernig hægt er að nýta sér þau til að styrkja mismunandi starfsemi á svæðinu. 

Á grunni „verkfærakistunnar" hafa síðan verið haldin námskeið fyrir fyrirtæki og einstaklinga um hvernig nýta megi sér betur gæði svæðisins í núverandi starfsemi og við þróun nýrrar.